上星期唔知係荷爾蒙影響定甚麼原因，自己對仔的耐性少左好多。明明已學到佢發脾氣時要冷靜，嘗試幫佢說出感受，但上星期就係按耐不住同佢一齊爆，結果當然大家都不快。我甚至忍不住又打了他一下。雖然好快佢又走返嚟攬住我喊，我又喊住同佢道歉，但其實會唔會已經造成一個陰影呢？又有一晚佢無論如何都唔瞓，搞左好耐搞到好夜，我又忍唔住推左佢出房， 結果佢可能好驚。有一晚佢出去飲完奶，我面向牆扮瞓，其實我無唔理佢架，但唔知係咪有陰影，仔飲完奶入房見到我咁，佢唔敢上床瞓，仲好似好驚我又唔要佢咁。

經過呢晚後，佢之後開始晚晚都唔肯瞓，而且呢幾日佢好似唔係好開心咁。成日呢喺床同櫃中間條拿，又話唔要媽媽，真係好自責早一星期唔應該控制唔到自己呢！我問下佢老師，原來有同學仔因為適應緊返兩個鐘而喊，可能因為咁影響左仔既情緒。雖然知道可能係咁，但又唔知可以做咩好。

我又可能太 chur, 係咁好想佢講咩事，但其實佢兩歲幾人仔可能真係未識表達，而我忘記了佢只係兩歲幾！直到尋晚，佢話佢唔開心，我問佢點解，佢話佢都唔知 … 確實令我有 d 當頭棒喝。今日坐巴士都默默祈禱，真係唔曉得點樣去處理，真係需要天父既幫助。

好神奇，今晚仔表現有 d 唔同。今日去公園玩時，佢問點解無小朋友，我話佢地都返左屋企沖涼同食飯喇。佢話唔係，可能因為佢地唔鍾意返學。於是我順勢問點解，等佢代入咁表達一下，佢話可能因為唔鍾意老師。我話仲有同學仔呀？佢話都唔鍾意。至於點解唔鍾意老師，佢話因為佢鬧佢地 …. 或者真係因為咁所以佢唔鍾意返學呢 …

聽日開始 fe 返菲律賓兩個月，實在係一個 challenge, 希望天父加力俾自己可以控制到自己情緒，又可以好好同仔去經歷啦！

之前一路都知道仔發脾氣我唔可以都一齊發，大家都會失控，但就係控制唔到自己！直到9月尾喺 Gary 移民前見面，提起仔既情緒爆發，佢教我幫佢講佢感受出嚟，例如：你係咪好嬲呀？係咪好唔開心呀？ 我之後真係有咁樣做，同時又感謝天父我竟然可以控制到自己既情緒無自己都發洩埋一份。經過幾次之後，有一次仔又發脾氣，佢竟然突然走埋嚟攬住我話佢好嬲，之後我就再安慰佢一下，好快大家又平靜返晒。

真係好感恩，因為天父幫助我搵到好 d 既方法去處理仔既情緒呢！

成日都記 d 負面事，今日記錄一下漿糊筆既可愛事先。

因為今日要做司琴要彈一首好少彈既詩歌，所以昨晚打開琴彈了兩下。想起有一晚臨睡前，漿糊筆問我：｢點解媽媽今日做司琴，尋晚唔使彈一次先既？｣好可愛，佢竟然記得我曾經有一次又係因為在家為做司琴而練習，而明白到做司琴前應該要彈下 d 詩歌預備一下！

小朋友既吸收同聯想力係你估唔到既！

今晚仔可能太眼瞓，又發脾氣，我又唔知做咩今晚忍唔住，佢食完人奶後唔夠要再食，我話已經無了，但佢唔肯，係都要，仲用腳踢我 … 我忍唔住衝出房邊鬧佢話我好痛同埋唔係淨係佢先可以發脾氣。

跟住佢開始著左，係咁喊，叫我入房我又唔肯入，之後拉我入房又同我 bye bye, 我真係好有情緒。結果我又拉佢出房唔俾佢入嚟 … 搞一大輪後，我同佢入房，但佢唔肯上床，企喺床邊喊。我覺得我應該要攬返佢，但佢唔肯俾我攬，一定要我上床。我上床後佢先繼續大喊。

當時我好傷心，傷心因為當佢咁樣喊同唔開心時我想攬佢，佢卻拒絕 … 覺得自己好失敗，好似變左一個飲佢要自己一個面對傷心既媽媽咁。心裡一直知道佢喊，我應該要攬佢等佢有安全感，但往往我又因為放低唔到自己情緒而做唔到。

真係好怕我會害左佢。呢一刻好想所有嘢能夠重頭嚟過，好想即刻改變，但我知道唔能夠，只能夠忍耐同等待 … 求天父幫助我下次喺仔唔開心時能夠放下自己情緒先俾佢一個擁抱！

最近下了多場大雨，雨過天雖清，河水卻被翻起的泥沙染成了混濁的泥黃色。

漿糊筆 2 歲 5 個月，充滿自主，每天都在爭扎刷牙洗手執拾等事情中鬥智鬥力，身心是何等的疲累。尤其叫了十次都未動身，肝火都動了他還未動，工人姐姐卻成功令他動起來，怎能不叫我感到洩氣呢？今天忍受不了情緒起伏仍要面對小淘氣，決定敝下他自己出外走走。平常愛看天的我，今天卻被這泥黃色的河水吸引。

發生的事就像下了一場雨，氣下了，雨停了，心裡原生家庭的影響卻像被翻出來了一樣。每天被他氣昏後，他都會 say sorry,  理智上知道自己要立刻擁抱他讓他體會被接納，對他心靈健康會是何等重要，但當下卻不能真誠接納他。坦白說，可能從小就害怕犯錯被抓著，免得被嚴厲的母親打，我自己也從未(或許我試過卻記不起來了) 體會過犯錯後立刻被接納是甚麼感受，會帶來甚麼影響。所以，做錯事了就害怕面對而不是尋求被接納。亦因此自己犯罪得罪主了，雖知道我們若認自己的罪神會赦免，但心裡就像感受不到被接納而仍有隔膜。

我不希望將這種後遺症帶到下一代，我希望他確實知道無論發生甚麼事，我仍然接納他愛他呢。

今日，仔仔返學前明明好地地換衫，我在廚房預備一樽茶準備送仔返學後同老公撐枱腳時飲既。突然仔仔不斷叫媽媽，我回頭看到他站在廚房門，情緒已有點崩潰，然後衝進來又打又哭，還邊拉我出廚房推我到大門口邊說：「媽媽，走 … 」說實在，真的摸不著頭腦。但聽著他說：「媽媽，走 … 走啦」卻確實很心傷。

心裡卻回想起這正正就是我曾對他做過的事，很是自責，因為我又用了錯誤的方法，又令他有著不恰當的回憶和「學習」。孩子確實是父母的一面鏡，從他身上就看得出自己的教養和價值觀。

事後我很後悔，因為我真怕有一天他真的會走了而不回來。所以那天晚上我同他在床上談心時，告訴他我不會再叫他走，亦希望他不會再叫爸爸媽媽走。可能我叫他走的烙印很深，真不知道要多久才能改變呢！

又上了很大代價的一課。